Pardna pon de taxi stan seh allahwe had betta start doin good befo bardniss ketch up wid we. He seh bardniss dun ketchin up wid a lotta people- bardniss a de moine iz loike poisen in de body mekkin people sick. Bardniss iz wah mekkin gas proice and food proice go up, somebordy wan kill out pooh people from off de eart an dats wah happnin. Lawdamussy!

Look pon wah goin on in Haitee. People in Barbadus bawlin how dem bread gettin smaller an smaller an deh gots to pay mo fuh it. De Guyaneze dem gorn woile killin wonannudda now deh tretenin to kill off de president. Amerika got she han full wid troyin to control oil in de east, conkerin an diwidin de arabs from solwin dere own tribal war problems, woile dere own homeland security suffarin wid people loosin deh jobs, deh house, deh Amerikan dream. Woyoyoyoooy!

Lawdamussy! Now in de middle af all dis global melleh wese lil ilunts jus a speck in de sea an de preemare startin trubble an stroife wid de kween representitiwe owah who to be deputy gowanor. Imagin dat? Wats de big deal bout who gets to be deputy gowanor? We caan aks fuh nobordy spechul to be gowanor becarsen we doan hawe dat power. Ef de gowanor hawe to power to seh who he wan to be he deputy wah de preemare mekkin noise bout it fuh? Settin up people to behawe wid ciwil disrespeck to de kween? An wen people behawe wid ciwil disrespeck to he foitin fuh dere roites az citizens he doan wan heah nutten bout dat! Lawdamussy! Wat a pistarkle!

Pardna seh, he dun tell de people long toime dat dis constitutooshun reform wuz nutten but a wase a toime. Dem change de name a de council, change de name a de cheef minister, but nutten else change. All dem got iz a brown paperbag full a air. Before dem tell people to go plant food an stop wastin dem money buyin hamma an tings wah usin nuff gas, dem wan people spen mo money pon gas. Supamarkit bun dun an all de low food proice gorn jus so. People, tiz toime we put bardniss asoide an tek warnin!