Lawdamussy! Pardna pon de taxi stan tell meh Oy doan know wah goin on but doan believe a ting wah dem seh bout dem caan foine one local police to be de deputy. Well sah! Pardna she a Depity essenshul, an tiz a Inglish man dem wan to put in dat posishun, an doan kere how much udders apply dem only waastin dem toime.

Oy cud tell yuh! Dem wan a nex woite man to come heah to mek row wid de locul police and udders black me in de force. Nex ting yuh heah, eeder he shot dem or dem shot he and somebordy goin jail go kill demself agen. Lawdamussy!

Pooh we. We ain mekkin no progress wen tiz one step forward an tree step back. Yuh mean to tell me we had two locul police cheef and we caan foine one locul depity? Nat a ting go so, Oy doan believe dat atall atall atall!. Well sah!

Dis WeeOyPee gowament got ti hands full. Water company, depity cheef a police, fore lane hyway, traffick loites and ole people ketchin cole pon Nanny Key beech. Wat a ting. De coat house full a drama wid touris goin jail fuh killin he woife, an all koines a udders wid wishous behaviour dat dem got to answer to an pay fuh. But dat ain all. De taximen ain happy wid how dem push Americkan law pon we an gots we up and dung wid all koines a change dat doan mek no sense. But Ah goin leve dat fuh anudda toime. Well, meh boy. Ti got ting!

Share this story

---